Bigarren partidua etxean, eta bigarren garaipena. Ondo hasi du denboraldia Mundarrok, mutilen Gipuzkoako lehenengo mailan; eta bereziki Astigarragako kiroldegian ari da erakusten bere indarra. 54-45 menderatu zuen Bosteko Irauli larunbatean, aurreneko zatian tarte haundia lortu ondoren.
Astigartarrek 16-12 hartu zuten aurrea lehenengo laurdenean, baina bigarrenean eman zuten kolpe nagusia: 11-4ko partziala lortu, eta 11 punturen aldearekin iritsi ziren atsedenaldira (27-16). Hortik aurrera, abantailari eustea zegokion Mundarrori, eta hala egin zuen, nahi baino gehiago kostatu arren. Donostiarrak zazpi puntura murriztu zuen aldea hirugarren laurdenean, baina azkenekoan sendo aritu ziren astigartarrak, eta garaipenak ez zien ihes egin.
Garaipenak ihes, Hernaniri
Beste porrot bat jaso zuen, aldiz, Hernanik, mutilen Gipuzkoako bigarren mailan: 57-61 galdu zuen etxean, Debasketen kontra. Ia partidu osoan izan zen markagailuan atzetik Hernani, baina uneoro garaipenaren lehian sartuta. 25-29 iritsi ziren atsedenaldira, eta hirugarren laurdenean debarrek aldea beste hiru puntutan haunditu arren (38-45), azkeneko laurdenean puntu bat aurretik ere izan zen Hernani. Bukaeran gehiago asmatu zuen Debasketek, ordea, eta ihes egin zien garaipenak hernaniarrei.