Ekain Lizeagak asteburu borobila izan du esku pelotan. Atzelari astigartarrak Oñatiko San Miguel Torneoa irabazi du, Egiguren azpeitiarrekin batera. 23 urtez azpiko mailan, 22-19 irabazi zuten, igandean Ariztegi eta Antton Apezetxea goizuetarraren aurka. Gainera, Lizeagak El Diario Vasco txapelketa preziatuan jokatu zuen ostiralean, Bergaran. Fernándezekin bikote osatuz garaipen borobila eskuratu zuten, 22-12, De la Fuente eta Azkarragaren kontra.
Bere anaia den Eñaut Lizeaga aurrelaria gaur, 19:00etan, Egiako Juanito Alvarez Memorialean izango da. Landarekin batera, Amiano eta García izango dituzte aurkari, Junior mailan.
Mundarrok, Hernani garaitu zuen
Gipuzkoako Txapelketan, Nagusien lehenengo mailan ere aritu zen Eñaut Lizeaga, larunbatean. Gurutzealderekin batera, Salaberria eta Labaka hernaniarrak garaitu zituzten 20-22.
Jardunaldi kaxkarra izan dute pasa den asteburuan C.D.Hernaniko pelotariek, txapelketa ofizial eta pribatuetan. Lau garaipen eta bederatzi porrot izan dituzte guztira.