Gobernuak astelehenean onartutako energia aurrezteko planean, doakoak izango dira ohiko erabiltzaileentzat Renfek kudeatzen dituen aldiriko, Rodalies eta distantzia ertaineko trenak irailetik abendura. Azaldu zutenez, helburua da «inflazioaren igoeraren aurrean familien presioa arintzea».
Errege lege-dekretuak adierazten du Estatuko Idazkaritzak finkatuko dituela doakotasun hori aplikatzeko mugak eta baldintzak. Edonola ere, Garraio Ministerioko iturriek zehaztu dutenez, asmoa da abonu berriak sortzea, nukleo bakoitzerako eta lau hilabeteko indarraldiarekin.
Doako abonu horiek aldirietan erosteko, erabiltzaileek 10 euroko fidantza ordaindu beharko dute, eta lau hilabete igaro ondoren itzuliko da hori, betiere epe horretan 16 bidaia baino gehiago egin badira (hilean lau, adibidez). Erabiltzaileak kopuru hori kreditu-txartelarekin ordaintzen badu, dirua zuzenean bere kontuan itzuliko zaio eta, eskudirutan egiten badu, bidaiariak leihatilara joan beharko du itzulketa eskatzera.
Hartutako erabakiak argitze aldera, asteleheneko agerraldian ordezkariek azaldu zutenez, zehaztutako mekanismoa «erraza» da. Erabiltzaile batek hileko abonu bat erosten duenean, diru-sarrera batzuk sortzen dira. Zerbitzu horiengatik, partzuergoek kopuru bat ordaintzen diote Renferi, eta hori izango litzateke Estatuak ordainduko lukeena, partzuergoak ordainketaren prezioa kopuru berean jaistearen truke, beste helburu batzuetarako erabiltzea eragotziz.