Santio Jaiak 2022

Santa Ana egunak jarriko dio erremate dotorea gaur, bost eguneko festari

Emanaldi ederra eskaini zuten Astigar taldeko dantzariek, beste behin.

Atzo agurtu zituzten Aranoko Santio Jaiak, eta gaur dute azkeneko eguna astigartarrek. Ez du hutsik egingo Santa Ana eguneko ospakizun bereziak, Foru Plazan.

Azkeneko orduak bizi dituzte aurtengo Santio Jaiek, Urumea bailaran. Egun haundiarekin agurtu zituzten Aranokoak atzo; eta gaur bertan bukatuko dira Astigarragakoak, Santa Ana egunak jarriko dien erremate dotorearekin.

Dultzaineroek eman zioten hasiera Santio egunari, Aranon.

Euskal kirola eta euskal dantzak izan ziren protagonista nagusiak atzokoan, Santio egunez, Aranoko zein Astigarragako jaietan. Herri kirolak izan ziren bi herrietan, esku pelota partidurik ez zen falta izan Aranon, eta udalbatzaren soka dantza ez ezik, Astigar dantza taldearen emanaldia ere izan zen Astigarragan.





Bertakotik asko izango du gaurko menuak ere, Astigarragako Foru Plazan, festei agur esateko: Zubietako joaldunak, trikitilariak, sagardo dastaketa, idi dema zein aizkolari eta harrijasotzaileak arduratuko dira horretaz. Bereziki ikusgarria izango da aizkolarien saioa, Gipuzkoako bigarren mailako txapelketa izango baita jokoan, Basozabaleko Jokin Urretabizkaia tartean dela.

Gainerakoan, haurrek ere izango dute zerekin gozatua, arratsaldeko ur parkearekin bereziki; eta Martindegiko Laiotz taldeak jarriko dizkie azkeneko musika doinuak Santioei, emanaldi bikoitzarekin: bigarrena, zezensuzkoaren txinpartak itzaltzen direnetik gauerdira arte.

Erlazionatuak

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!