Artilea biltzeko bi egun finkatu ditu Mendialdeko Mankomunitateak, Goizuetan. Uztaileko bi astelehenetan izanen da, hilaren 11n eta 18an; eta Goizuetako garbigunean eginen dute, arratsaldeko 14:00etatik 16:30etara. Bertara, zakuetan eraman beharko dute artilea artzainek, eta ez obretako saka haundietan. Baimendutako kudeatzaile bati, Ecoferti, emanen dio artilea Mankomunitateak, konposta egin dezan.
Zerbitzuaren kostua izanen da artzainek ordaindu beharko dutena: tratamendua eta garraioa. Eramandako artile kilo kopuruaren araberakoa izanen da kostu hori. Artzainak berak pisatuta eramanez gero, pisua adierazten duen baskulako tiketa eraman beharko du. Aldiz, pisatu gabe eramanez gero, Mankomunitateak pisatuko du artilea garbigunean.
Bitartekari lana «besterik ez» du eginen Mankomunitateak, artile bilketan: «izan ere, artilea hiri hondakin solidoa ez denez, ez daukagu gehiagorako eskumenik», azaldu du. Baina behin behineko laguntza bat emateko asmoz jarri du ekimena martxan: «abeltzaintzak eskualdean duen garrantzia ikusita, eta artzainek artilea kudeatzeko dituzten zailtasunak agerian, artilea behar bezala kudeatzeko irtenbide puntuala emateko modua bilatu dugu», nabarmendu du.
Goizuetan bezalaxe, Leitzako garbigunean ere jarri dituzte bilketa egiteko egunak: uztailaren 12an eta 19an, 09:00etatik 13:00etara eta 15:00etatik 17:30etara; eta uztailaren 14an, 15:30etatik 19:00etara.