Txapel bat ez, bi jantzi ditu Hodei Lujanbio goizuetarrak, joan den asteburuan. Euskal Herria Mendi Erronka lasterketan aritu zen larunbatean Leitzan, eta errelebo proban hartu zuen parte, Oihana Zubillaga anoetarrarekin batera. 67 kilometroko ibilbidearen aurreneko erdia osatu zuen goizuetarrak, Leitzatik Aralarko San Miguelera, Guratz eta Irumugarrieta tontorrak tarteko; eta bigarren erdia Zubillagak. Bien artean, 6:50:59 denboran osatu zuten proba, aurrenekoak izan ziren helmugan.
Gainera, EH Mendi Erronkaren ibilbide osoa egin zuten bailarako bi korrikalarik: Aitzol Larrañaga astigartarra 52garren helmugaratu zen, 8:50:42 denborarekin; eta Iñigo Uranga hernaniarrak 11:32:24 denboran osatu zuen 67 kilometroko ibilbidea, 211garren iritsita.
Igandean, berriz, Intxixu Trail lasterketa (16,5 kilometro) jokatu zen Oiartzunen, eta horretan ere txapeldun izan zen Hodei Lujanbio (1:19:06), Aitor Zunzunegi legorretarrarekin batera helmugaratuta. Urumea bailarako beste hiru korrikalari ere izan ziren partehartzaileen artean: Anartz Mendizuri hernaniarra (1:47:09), Joserra Lopez astigartarra (1:47:30), eta Izaskun Zubitur hernaniarra (2:13:01).