Hitzordu garrantzitsuak izango dituzte asteburuan, bailarako txirrindulariek, maila guztietan. Afizionatuetan, Euskaldun Torneoko bi proba izango dituzte. Loinaz Proban (134 kilometro) ariko dira gaur, 09:30etan Beasainen, bost mendate igota: Larraitz, eta Atagoiti eta Olaberria bi bider. Eta bihar, San Martin Proba (124 kilometro) izango dute, 10:00etan Ataunen: Abaltzisketa eta Larraitz bi bider igoko dituzte, eta Lazkaomendi eta Urkillaga azkeneko kilometroetan. Jubenilek, berriz, Euskal Herria Torneoko lasterketa izango dute gaur, 16:00etan Anoetan, 102,5 kilometroko ibilbidearekin. Eta kadeteek, azkenik, bi hitzordu izango dituzte. Batetik, Euskadiko Txapelketa jokatuko dute gaur, Etxebarrian: bigarren urteko kadeteek, 61,7 kilometroko ibilbidea osatuko dute, 15:00etan hasita; eta lehenengo urtekoek, 47 kilometro egingo dituzte, 17:00etan. Bihar izango dute bigarren hitzordua, 16:30etan Oñatin: Olakua Saria (69 kilometro).