Hernaniko bi talde nagusiek sekulako garaipenak lortu zituzten pasa den asteburuan, eta nabarmentzekoa da Ohorezko Erregional mailako neskek jokatutakoa. Denboraldiko azken partidua jokatu zuten Touring taldearen aurka, 0-4 irabaziz. Ondorioz, hirugarren gelditu dira neska berdeak, 58 punturekin.
Ohorezko Erregional Mailako mutilek, larunbatean jokatu zuten denboraldiko azken aurreneko partidua etxean, Oiartzunen aurka, eta berdeak nagusitu ziren: 0-3. Seigarren postuan jarraitzen du Hernanik 54 punturekin, eta aurrean Mondragon dago, puntu berdinekin. Asteburu honetan, denboraldiko azkeneko partidua jokatuko dute mutil nagusiek, Oñatin, Aloña Mendiren aurka.
Erregional Preferenteko igoera fasean, Mundarroko neskek ez zuten Orioko garaitzea lortu, 0-0 amaitu baitzuten norgehiagoka. Beraz, momentu honetan bi partiduren faltan bosgarren postuan doaz neska moreak. Hernaniko neskek, berriz, Erregional Preferentean, Intxaurdiren aurka neurtu zituzten indarrak, eta porrota jaso zuten, etxean: 1-2. Beraz, Hernani, sailkapeneko 8garren postuan doa, 14 punturekin. Maila berean, mutil berdeek, Zestoa izan zuten aurrez-aurre, Zubipen, eta 3-1eko markagailuarekin nagusitu ziren. Momentu honetan, hirugarren postuan doaz, eta ondorioz, hurrengo urterako mailari eutsi diote.
Jubenilen Liga Nazionalean, Hernanik porrota
Hernaniko mutiletan, Liga Nazionalean, Aurrera de Vitoria hartu zuten Hernaniko gazteek, etxean, baina ezin izan zuten talde gasteiztarra garaitu (1-2).