San Isidro beroa ospatu zuten baserritarrek eta herritarrek, atzokoan, Astigarragan eta Hernanin. Termometroek 30 gradutik gora markatu zuten. Beraz, Ceberio Zubelzu familiak omenaldi beroa jaso zuen Tilosetan, alde guztietatik begira, Udalaren eta herriaren aldetik, beraien 80 urte luzeko lanari aitortza eginez. Aurretik pala eta esku pelota partiduak izan ziren. Ojuel eta Labakak 22-14 garaitu zituzten Urkizu eta Ortiz de Urbina.
Bertsolariek ere girotu zuten eguerdia eta izerdi mordoa bota zuten Malen Barrenetxea Solano, Axel Larrañaga eta Oier Kañamares aizkolariek. Malenek 13 urte ditu eta lehenengo plaza zuen. Astigarragan ere jendea pilatu zen idi probak ikusteko. Harria estreinatzen zen eta kosta zitzaien mugitzea. Arratsaldean, ekaitza eta gero, herri kirol jaialdia izan zen.