Gipuzkoako Ligako azkeneko jardunaldia jokatu dute asteburuan, mutilen lehenengo mailan, Mundarrok eta Hernanik. Etxean aritu ziren astigartarrak, eta 13garren garaipena lortuta bukatu dute denboraldia, Bergara Soraluze 62-40 menderatu ondoren. Atsedenaldira 10 punturen aldearekin iritsi (33-23), eta hirugarren laurdenean ziurtatu zuen garaipena (50-28). Horrela, zazpigarren bukatu du ligan.
Hernanik, ordea, porrot gogorra jaso zuen Donostian, Internacionalen kantxan (94-64), eta jaitsiera saihesteko kanporaketa dauka buruan orain: datozen bi asteburuetan jokatuko du, Askatuak taldearen kontra, joaneko eta bueltako partiduekin. Irabaziz gero, mailari eutsiko dio, eta jaitsi egingo da bestela.