Arrakasta haundia ari da izaten Bertso Gutiziak emanaldi berezia, bi urteko etenalditik bueltan; eta dagoeneko saldu dira Kronikaren bulegoan eskuragarri jarritako sarrera guztiak (50). Hori horrela, bailarako lau tabernatan daude salgai, azkeneko sarrerak, 30 euroan: Hernaniko Kixkalen eta Aralarren, Astigarragako Ikatzan, eta Ereñotzuko Irrintzin.
Maiatzaren 13an izango da Bertso Gutiziak, Basque Culinary Centerren, arratsaldeko 19:00etan hasita. Ainhoa Urien gai-jartzaileak proposatutako gaiekin, puntako lau bertsolari ariko dira taula gainean: Maialen Lujanbio, Unai Agirre, Amets Arzallus eta Oihana Iguaran. Eta bertso saioaren ondoren, gutiziaz osatutako luntx-afari goxoa izango da, Basque Culinary Centerreko ikasleen eskutik. Kronikak antolatu du emanaldia, Insalusen laguntzarekin.