Maiatza izango da Urumea bailaran, aurten ere, mendi lasterketen hilabetea bi urtez bertan behera geratu eta gero, pandemiaren eraginez. 2020an eta 2021ean ez zen mendi lasterketarik izan bailaran eta aurten maiatzaren 15ean eta maiatzaren 21ean egingo dira Ereñotzuko Mendi Lasterketa eta Goizutrail, sei eguneko epean.
Pandemiaren ondorioz, bi urteko etenaldiaren ondoren, 10.edizioa ospatuko du Ereñotzuko Mendi Lasterketak. Maiatzaren 15ean izango da lasterketa eta oraindik izena emateko aukera dago rockthesport webgunean. Lasterketa, goizeko 10:00etan izango da, eta Ereñotzuko frontoitik abiatuko dira parte hartzaileak.
Urtero moduan, umeen lasterketa ere izango da. Haurren lasterketa, helduenaren aurretik ospatuko da. Etxeko txikienek Ereñotzun barrena emango dute buelta, eta helduen laguntza ere eduki ahal izango dute horietako askok. Antolatzaileek adierazi dutenez, umeen lasterketa doakoa da eta ez da izena eman beharko bertan parte hartzeko.
Aurten ere, Goizutrail lasterketa antolatu ahal izango da maiatzaren 21ean. Bi urtez, osasun egoera medio, ezinezkoa izan zen egitea. Aurten, berriz, lasterketaren zazpigarren edizioa indartsu dator.
Goizeko 09:00etan Plazatik abiatuta, aurreko urteetako hiru aukerak izango dituzte partehartzaileek, zazpigarren edizio honetan ere: 25 kilometrokoa, 10 kilometrokoa, edo ibilbide luzea erreleboka (batek 10 kilometro eta besteak 15). Eneko Elorri aldera egingo dute aurreneko zatia, eta Mandoegin gora bigarrena. Izenematea zabalik dago herrikrosa webgunean, maiatzaren 20ra arte.