Bueltan da Bertso Gutiziak ekitaldi berezia, Kronikak antolatuta, Insalusen laguntzarekin. Maiatzaren 13an izango da, Basque Culinary Centerren, arratsaldeko 19:00etan hasita: bertso saioa aurrena, eta gutizia bereziz osatutako luntx-afaria ondoren.
Puntako lau bertsolari ariko dira oholtza gainean: Maialen Lujanbio, Unai Agirre, Oihana Iguaran eta Amets Arzallus. Ainhoa Urien ariko da gai-jartzaile lanetan. Eta saioaren ondoren, Basque Culinary Centerreko ikasleek prestatutako gutizia goxoekin afaltzeko aukera izango dute bertaratuek.
Sarrerak gaurtik aurrera daude salgai, Dobera-Kronikaren bulegoan (Larramendi kalea 11), eta honako tabernetan: Hernaniko Kixkalen eta Aralarren; Ereñotzuko Irrintzin; Goizuetako Amaia kafetegian; eta Astigarragako Ikatzan. Prezioan azken orduko aldaketa izan da: 30 euro izango dira, eta hiru euroko deskontua izango dute Doberako bazkideek eta Kronikalariek, Kronikaren bulegoan erosita (27 euro). 150 lagunentzako izango da tokia.