Dagoeneko herri ugaritan izan du geldialdia Eskubaloiaren Asteak, besteak beste, Ordizian, Zumarragan eta Hernanin. Oraindik beste hiru herritan du hitzordua, eta gaurkoan, astigartarrek izango dute aukera, eskubaloia ezagutu eta gozatzeko. Astigarragako kiroldegian jarri dute zita, arratsaldeko 18:00etan hasita. Bera Bera taldeko jokalariak egongo dira bertan, beraien esperientzia ezagutzera emateko. Emakumezkoen eskubaloiari zuzendutako saioa izango da, adin tarte guztietarako prestatu dute, hala nola, benjamin, kadete, alebin, jubenil eta infantil.
Ekintza hauek irekiak izango dira, beraz, antolatzaileek astigartarrei bertaratzeko eta parte hartzeko gonbitea luzatu diete. Datozen geldialdiak Lezon eta Donostian izango dira, eta honela emango da amaitutzat Eskubaloi Astea.
Hernanin, giro ederra
Adin guztietako herritarrak bertaratu ziren, Atsegindegin ospatu zen Eskubaloiaren Astera. Eskubaloia praktikatzeko parada izan zuten gazteek, eta mota guztietako ariketak egin zituzten, eskubaloia ezagutzeko asmoz. Horrez gain, bertaratu zirenen artean, eskubaloiko materialak zozketatu ziren, besteak beste, eskubaloiko partiduetarako sarrerak eta kantinplorak.