Aste Santua tarteko, bi asteko etenaldia izan du literaturak, Astigarragako eta Hernaniko kultur etxeetan. Baina oporralditik bueltan, indartsu ekingo dio berriro, eta lau hitzordu jarri dituzte gaurtik asteazkenera, Erriberan eta Biterin.
Gaurkoan, literatur solasaldia izango da Erriberan, arratsaldeko 19:30etan hasita. Oscar Wilde idazlearen De Profundis epistolari buruz ariko dira, Jorge Carrerok gidatuta, gaztelaniaz.
Bihar, berriz, Irarkuketa Klubak izango du hitzordua Erriberan, 19:30etatik aurrera. Hilabete honetan, Ana Malagon idazlearen Ez dakit zertaz ari zaren ipuin-liburuari buruz ariko dira. Ohi bezala, irekia eta doakoa da partehartzea, eta Joanes Jauregik gidatuko du saioa.
Bihar bertan, baina Biterin, Emakumeen Euskal Literatura Mintegiak ere egingo du hilabete honetako saioa, Kattalin Minerrek gidatuta. Arratsaldeko 19:00etan izango da, liburutegian, eta Natalia Ginzburg idazlearen Familiako lexikoa liburua izango dute aztergai, Fernando Reyk euskerara itzulitakoa. Aforoa mugatua izango da.
Eta azkenik, haurrentzako hitzordua jarri dute asteazkenerako, Biterin. Izan ere, ipuin kontaketa saio bikoitza eskainiko du Ixabel Agirresarobek, 4 eta 6 urte bitarteko haurrentzat. Arratsaldeko 17:30etan izango da aurreneko saioa, eta 18:15etan bigarrena. Horietarako ere, mugatua izango da aforoa, eta gonbidapenak eskuratu behar dira aldez aurretik, liburutegian.