Oso bereziak izango dira datozen hamar egunak, Gipuzkoako eskubaloiarentzat eta emakumezkoen kirolarentzat. Donostia Arenan (Ilunbe) jokatuko da Erreginaren Kopa, apirilaren 29tik maiatzaren 1era; eta horren inguruan, egitarau potoloa prestatu dute, aurreko egunetan. Horrela, esaterako, Emakumezkoen Kirolaren Foroa egingo dute apirilaren 28an, Orona Ideoko auditorioan.
Bertan, hitzaldiak, mahai inguruak eta eztabaida guneak izango dira, goi-mailako kiroleko protagonistekin. Aurreneko mahai inguruan, adibidez, Patricia Rodriguez, Aintzane Encinas eta Tati Garmendia izango dira solaskide, Eli Pinedo moderatzaile dutela. Foroko partehartzaileen artean izango dira, baita ere, Maialen Chourraut, Erika Dos Santos, Lucia Ybarra, Ona Carbonell eta Leire Olaberria. Fororako sarrerak salgai daude, 15 euroan, copadelareina2022.com webgunean. Prezioaren barne daude eguneko saio guztiak eta luntxa.
Baina foroaz gain, Eskubaloiaren Astea ere antolatu dute, aurreko egunetarako, Gipuzkoako zenbait herritan; eta Urumea bailaran ere egingo du geldialdia. Izan ere, saio bana egingo dute Hernanin eta Astigarragan. Aurrena, igande honetan bertan, kalean eskubaloiean aritzeko gonbitea luzatu dute: Tilosetan izango da, 10:30etatik aurrera, neska-mutil infantil, alebin eta benjaminei zuzenduta.
Eta ondoren, datorren asteartean, Astigarragako kiroldegian jarri dute hitzordua: Bera Bera taldeko jokalariak izango dira bertan, bere esperientzia ezagutzera emateko, arratsaldeko 18:00etatik aurrera. Bereziki emakumezkoen eskubaloiari zuzendutako saioa izango da, benjaminetatik hasi eta jubeniletara.
Irekiak izango dira bi ekintzak, eta neska-mutil hernaniarrei zein astigartarrei luzatu diete gonbitea, bertaratu eta parte hartzeko. Ordizian, Zumarragan, Lezon eta Donostian ere izango dira ekintzak, Eskubaloiaren Astean.