Hondarribiatik abiatuko da, gaur arratsaldean, Euskal Herriko Itzuliaren 61garren edizioa. Eta oraingoan bai, partehartzaileen artean izango da Xabier Mikel Azparren astigartarra, etxeko lasterketan debuta egiteko.
Aurten ez da Urumea bailaratik pasako Itzulia, baina gertu hasiko da bigarren etapa, bihar: Leitzatik abiatu, eta Nafarroako hegoaldera egingo dute, Vianan bukatzeko.
Erlojupeko batekin hasiko da lasterketa gaur, Hondarribian: 7,5 kilometro gorabeheratsu, herrian barrena. Arratsaldeko 14:03etan abiatuko da aurreneko txirrindularia, eta 17:21etan azkenekoa.
Biharkoa Vianan bukatu ondoren, Araba eta Bizkaia aldera joango da Itzulia. Laudion hasi eta Amurrion bukatuko dute hirugarrena, Gasteiztik Zamudiora egingo dute laugarrena, eta Zamudion bertan hasi eta Mallabiara iritsiko dira bosgarrenean. Azkeneko etapa, ohitura bilakatu den bezala, Eibarren hasi eta Arrateko santutegian bukatuko da.
Itzuliko kronikak egunero, 'kronika.eus' webgunean
Aurreko urteotan bezala, Itzuliko etapa bakoitzaren kronika egingo du Andoni Urbistondo kazetariak, eta kronika.eus webgunean izango da irakurgai.
Protagonista izateko gogotsu, Xabier Mikel Azparren
Bakarkako lanean espezialista izanik, proba polita izango du Azparrenek gaur, txirrindulari onenen aurrean. Eta hurrengo etapetan ere, protagonista izaten saiatuko da. Sasoi onean iritsi da, behintzat. Alentejoko Itzulian etapa bat irabazi eta sailkapen nagusian bigarren bukatu ondoren, Miguel Indurain Sari Nagusian aritu zen herenegun, Lizarran; eta erasoa jo zuen helmugatik 16 kilometrora, Astanako txirrindulari batekin. Tropelak ez zien bidea egiten utzi, eta laster harrapatu zituen. Ondoren, 34garren izan zen astigartarra, helmugan.
Xabier Mikel Azparreni elkarrizketa egin zion Txirrindulariak.com atariak, duela egun gutxi: