Morez jantziko da bailara, gaurtik, izan ere, bihar da Emakumeen Nazioarteko Eguna eta hainbat jarduera antolatu dira gaurtik hasita, Urumea bailaran. Gaur arratsaldeko 18:00etan Emakumeon Etxea aldarrikapen mezuekin apaintzeko eta manifestazioetara eramateko pankartak egingo dira, eta horrekin batera, Xaguxarrek haurrentzako tailerra ere antolatu du. Jarraian, 19:00etan, hain justu, kontzentrazioa eta manifestuaren irakurketarekin emango zaio amaiera gaurko egunari, Emakumeon Etxearen sarreran.
Astigarragaz gain, Hernanin, gaur arratsaldeko 19:00etarako, Elkar zainduz arriskutsuak gara! erakusketaren irekiera antolatu da, Covid-19ak emakumeen bizitzetan izan duen inpaktuari buruzkoa. Kulturarteko Plaza Feministan izango da, Emagin Elkartearen eskutik. Bihar, berriz, mobilizazioak egingo dira, bailara osoan.
Astigarragako Udalak bat egin du, egun hauetarako antolatu diren ekimenekin, eta astigartarrak animatu nahi izan ditu parte hartzera: «Behar bezala aurre egin behar diogu daukagun erantzukizun publiko haundiari, eta hori premisa feministatik egin behar da». k