Martxoaren 31n abiatuko da Korrika Amurriotik, eta apirilaren 10ean iritsiko da Astigarragara eta Hernanira, Donostian bukatu aurretik. Baina motorrak berotzen hasteko, Korrika Eguna ospatuko dute bi herrietan. Gaur bertan izango da ospakizuna Hernanin, goiz osoan zehar.
Ekintzak Tilosetan egitea aurreikusi zuten, baina eguraldi txarra eginez gero, Atsegindegin izango dira. Hain justu, euria espero da gaur, eta beraz, litekeena da bertan izatea festa. Goizeko 10:30etan hasiko da, haur eta gazteentzako ekintzekin, Kanika aisialdi taldearen eta Gaztelekuaren eskutik. Eguerdira arte izango da hori, eta orduan, 12:00etan, emanaldia eskainiko dute Ttarla dantza taldeak eta Kantuz abesbatzak. Eta ekitaldi horretan bertan, omenaldia egingo diete, aurtengo Korrikaren Hernaniko omenduei.
Eta segidan, Kaxkoko tabernetan jarraituko du festak, triki-bertso poteoarekin, Paulo Ttikiya bertso eskolaren eskutik. 12:30etatik 14:00etara izango da.
Hernaniko AEK euskaltegiak herritar guztiak animatu ditu, ekintzetan parte hartu eta Korrikaren alde egitera.
Astigarragan, gaur zortzi
Datorren larunbatean izango da Korrika Eguna, aldiz, Astigarragan. Goizeko 10:00etatik aurrera, denetik izango da: pelota partiduak, zirku ikuskizuna, dantza, aurpegi margoketa, bertso-bazkaria, txaranga...