Joan den astean hasi zuten Gipuzkoako errepideko denboraldia, txirrindulariek, afizionatuen eta jubenilen mailako lasterketekin. Eta oraingoan, kadeteek emango diote hasiera denboraldiari. Beasainen ariko dira, gaur bertan: Usurbeko Proba jokatuko dute, goizeko 11:00etan hasita, 40 kilometroko ibilbidearekin. Jubenilek, berriz, bihar daukate hitzordua, Errenterian. Arratsaldeko 16:00etan hasiko dute lasterketa, eta 77 kilometroko ibilbidea izango dute, Gaintxurizketa bost aldiz igota; azkenekoz, helmugatik 5 kilometrora.