Urumea bailara kolorez jantzi eta musikaz busti zen atzoko egunean ere. Hernanin, haurrentzako ekintzak izan ziren nagusi, eta herritarrak kalera atera ziren inauteri giroaz gozatzera. Dianak esnatu zuen herria, goizeko 09:00etan. Gero, itsasoko herri kirolak izan ziren umeentzat, Atsegindegin; eta, eguna ezin hobe amaitzeko, arratsaldean, gaztetxoek aukera izan zuten puzgarrietan gozatzeko. Goizuetan, kalejira, mozorroen irteera, txokolatada, trikitilariak eta mozorroen afaria izan ziren, besteak beste, eguneko ekintza protagonistak.
Gaurkoan, berriz, Hernanin, agur esango diete aurtengo inauteriei. Sardinaren ehorzketa izango da, arratsaldeko 18:30etan hasita, Dultzaina taldearen laguntzarekin. Plazatik abiatuko dira, eta bertan bukatuko dute emanaldia.
Egun osorako egitaraua prestatu dute Goizuetan
Goizuetan, jai-giroak ez du etenik izanen larunbatera arte. Hain zuzen, martxoaren 5era arte ekintzak prestatu dituzte herrian. Gaurko, egun osorako egitaraua izanen dute goizuetarrek. Goizetik hasita gauera arte izanen dute inauteriez gozatzeko parada.
|
INAUTERIAK HERNANI GOIZUETA |