Erritmo biziko eguna izan zen atzokoa Urumea bailaran, Inauteriek jarri zuten martxarekin. Mota guztietako dantzek hartu zuten protagonismoa, eta lurra dardarka jarri zuten haurrek, gazteek zein helduek, Inauteri igande ederrak piztu zien ilusioarekin eta gogoarekin.
Astigarragan, Iñude eta Artzaien konpartsaren umore onak hartu zituen herriko kaleak eta plazak, txistulariek, txarangak eta danborradak markatutako erritmora. Hernanin ere, giro ederra jarri zuen Ttarla dantza taldearen konpartsak, herri osoan barrena. Eta Goizuetan, ezin bereziagoa izan zen gaztetxoen Zahagi Dantza, bi urteko itxaronaldiari bukaera emateko, eta Inauteriei hasiera.
(Felix Loiarteren argazkiak)
Inauteriek segida izango dute gaur, bailarako bi herritan. Hernanin, azkeneko festa eguna izango dute, bihar Sardinaren Ehorzketa egin aurretik. Hernaniko Soinua Elkartearen dianak herria esnatuta, itsasoko herri kirolak izango dira haurrentzat goizean, eta puzgarriak gaztetxoentzat arratsaldean, biak ere Atsegindegin.
Goizuetan izango da bereziagoa, gaurko eguna. Goizean goiz egingo dute irteera baserrietara, Mozorroek; eta ondoren, Akelarre itxura hartuko du herriak. Lur eta Amets pelikula ikusi eta txokolatadaz gozatuko dute arratsaldean, Mozorroak herrira iritsi aurretik.
