Mozorroz eta kolorez bete dira Hernaniko kaleak, aurreko bi egunetan, eta dantzan jarri dute herria, adin guztietakoek. Ospakizunek segida izango dute bertan, gaurkoan ere, Ttarla dantza taldearen konpartsaren irteerarekin (12:00), Hernani Musika Eskolako trikitilarien kalejirarekin (19:00), eta Tilosetan izango den Trash!!! ikuskizun umoretsuarekin (19:30).
Baina gaurkoa, bailara osoan izango da egun haundia, lau haizetara zabalduko baitira Inauteriak. Izan ere, bueltan dira Zahagi Dantza eta mozorroak Goizuetan, eta gaur hasiko dute lau eguneko festa haundia. Gaztetxoen Zahagi Dantzak emango dio hasiera, arratsaldeko 17:00etan; eta Garazi eta Gorka trikitilariek herria alaitu ondoren, aurreneko afaria egingo dute mozorroek.
Iñude eta Artzaien konpartsa, Ergobitik abiatuta
Baina Hernanin eta Goizuetan bakarrik ez, Astigarragan ere gozatuko dute Inauteri giroaz, gaur goizean eta eguerdian: Iñude eta Artzaien konpartsa aterako da, danborradarekin batera, 11:30etan Ergobiko plazan hasita. Dozenaka ofiziotako langileak irudikatuko dituzte herritarrek, garai bateko jantziekin; eta Astigarragako kaleetan barrena ibiliko dira, 13:00ak aldera Joseba Barandiaran plazara iristeko. Bertan emango diote bukaera, konpartsari.
GOIZUETAKO INAUTERIAK
Urtebeteko etenaldiaren ondoren, bueltan dira Inauteriak Goizuetan. Gaur hasiko dira, gaztetxoen Zahagi Dantzarekin, eta lau egun berezi dauzkate aurretik, gozatzeko.
GAUR, igandea
17:00, Gaztetxoen Zahagi Dantza
18:30, Garazi eta Gorka trikitilariak
21:00, Mozorroen afaria
BIHAR, astelehena
08:00, Mozorroen irteera baserrietara
10:00, Plazaren apainketa. Gaia: Akelarrea
11:30, Kalejira herrian zehar
13:00, Salda eta txorizo egosia
16:30, Pelikula: Lur eta Amets
18:00, Txokolatada
18:30, Garazi eta Gorka trikitilariak
Ilunabarrean, Mozorroen etorrera dultzaineroekin
22:00, Mozorroen afaria
ETZI, asteartea
09:00, Mozorroen gosaria
10:00, Mozorroak dantzan herriko kaleetan
14:30, Mozorroen bazkaria
17:30, Zahagi Dantza, Motzanetik hasita
19:00, Pantxo Balbuena mexikarra
22:00, Mozorroen afaria
MARTXOAK 5, larunbata
13:00, Poteoa, Igandea txarangarekin
14:30, Mozorroen bazkaria
17:30etatik aurrera, Igandea txaranga herrian zehar
