Emaitza kaxkarrak lortu dituzte azken jardunaldian, bailarako saskibaloi taldeek. Gipuzkoako lehenengo mailan, hain justu, ez dute garaipenik izan ez Hernanik ez Mundarrok.
Astigartarrek indarrak neurtu zituzten Takeren aurka, Tolosako kiroldegian. Norgehiagoka latza izan zen moreentzat, etxekoak nagusi izan baitziren partidu osoan, eta, horrela, ez baitzuten aukera izan aurrera egiteko. Azkenean, markagailua 53-11 itxi zen tolosarren alde.
Bestalde, Gipuzkoako lehenengo mailan, baita ere, hernaniarrek 68-54 galdu zuten Donostia Dolphins taldearen kontra. Donostiarrek norgehiagokaren gidaritza hartu zuten hasieratik, lehenengo laurdenean erraz hartu baitzuten aurrea 23-11ko emaitzarekin. Gainerako laurdenetan bi taldeak nahiko paretsu aritzea lortu bazuten ere, partiduaren lehenengo minutuak erabakiorrak izan ziren Donostiakoentzat.