Korrika urtea da aurtengoa, eta 22. edizioak Amurrion hasiko du ibilbidea, martxoaren 31n, arratsaldeko 16:30etan. Lekukoak Euskal Herriko herri guztietatik barrena egingo du ibilbidea, eta, noski, Urumea bailaratik ere pasako da. Astigarragara apirilaren 10ean iritsiko da, goizeko 06:19 aldera. Hernanira, berriz, beraduxeago, 06:49etan. Azken geldialdia Donostian izango da, apirilaren 10ean, 12:30etan.
Prestakuntza-lanetan AEKri laguntza emate aldera edo, bestela, 22. Korrikan parte hartzeko, batzordeak antolatu dituzte AEK-ko kideek. Astigarragan, gaur izango da, arratsaldeko 19:00etan, kultur etxe zaharrean. Hernanin, berriz, etzi jarri dute hitzordua. AEKn egingo dute bilera, 19:00etan hasita.
Lehengo batzordean hitz egindakoaren bueltan, AEK-ko lantaldeak eskerrak eman dizkie bertaratutakoei, eta, horrekin batera, datozen hitzorduetan parte hartzeko gonbita luzatu diete. «Guztion beharra dugu denon gustuko ekimen indartsuak eta gogoangarriak aurrera eramateko».