Santa Ageda bezpera ate joka dugun honetan, ahotsak berotzen dabiltza Urumea bailaran. Gaur aterako dira Astigarragako Norberto Almandoz musika eskolako abesbatzak eta musika hizkuntzako ikasleak, koplak abestera, arratsaldeko 18:15etan Erriberako ataritik abiatuta. Ereñotzun, berriz, bihar arratsaldeko 16:00etan aterako dira santa eskean, Ur Mia elkartetik; eta bailara osoan ibili ondoren, Larre Gainen bukatuko dute, afaria eginez. Eta Hernanin, bihar arratsaldeko 17:45etan jarri du hitzordua, Milagrosan, Ohitura Zaharrak taldeak. Haiek, gainera, bigarren entsaioa egingo dute gaur arratsaldeko 19:30etan Biterin.