Ohi bezala, egun berean bilduko da Plenoa, Hernanin eta Astigarragan. Gaur arratsaldean izango dute urteko aurrenekoa, 18:00etan Hernaniko Udalak eta 19:00etan Astigarragako Udalak; eta bi kasuetan, gai gutxi izango dituzte lantzeko.
Hernanin, abenduko eta urtarrileko dekretuen berri eman ondoren, hiru mozio izango dituzte lantzeko: Ernai Gazte Antolakundeak aurkeztutakoa bat, apustu etxeak gaitzetsiz; pentsiodunen kolektiboarena bigarrena, banketxeetako leihatilen inguruan; eta Elkarrekin Podemos-Orain Hernani udal taldeak aurkeztutakoa azkenik, osasun mentalaren ingurukoa.
Astigarragako Plenoan, berriz, ez dute moziorik izango eztabaidagai; eta bi puntu dauzkate lantzeko, aurreko aktaren onarpenetik eta erregu eta galderen puntutik harago. Aurrenekoa izango da 2022ko ordainsarien igoerari buruzkoa. Eta bigarrena, kontratazio espediente bat: Donostia Ibilbidea berrurbanizatzeko obrei dagokiena.
Gaur bertan, beste bilera bat ere izango da Astigarragako udaletxean. 18:30etan bilduko da Tokiko Gobernu Batzordea, alkatetzan, eta hainbat gai izango dituzte lantzeko: Urumea kaleko etxebizitza bat lehentasunez erosteko eta atzera eskuratzeko eskubidea; 2020-2023 dirulaguntzen Plan Estrategikoaren aldaketa; dirulaguntza izenduna Andre Maria parrokiarentzat, alokairu sozialera bideratuko diren etxebizitzak egokitzeko obretarako; eta Erribera kulturguneko zerbitzu tekniko-eszenikoa eta publikoaren arreta zerbitzua kontratatzeko espedientea.