Hasi dira beroketa eta prestaketa lanak, martxoaren 31n abiatuko den Korrikarako. Eta Astigarragan eta Hernanin ere, ari dira lanean, aurtengo hitzordu bereziari begira.
Aurreko astean egin zuten estreinako Korrika Batzordea, bi herrietan. Asteartean egin zuten Astigarragan, eta ostegunean Hernanin. Herri bakoitzean Korrikak egingo duen ibilbidea komentatu zuten bertan, Korrikaren aurretik izango diren ospakizunak landu zituzten, eta ostegun honetako hitzorduez ere aritu ziren. Izan ere, Korrikaren aurkezpena egingo dute etzi, Hernanin eta Astigarragan.
Atsegindegin egingo diete aurkezpena hernaniarrei, arratsaldeko 19:00etan hasita. Eta Ikatza tabernan emango dizkiete aurtengo Korrikaren xehetasunak astigartarrei, ordu berean. Bertan azalduko dute Korrikak herri bakoitzean egingo duen ibilbidea, Korrika Egunaren berri emango dute, abestiaren bideoklipa aurkeztu... Eragile eta herritar guztiei luzatu diete deia, bertan parte hartzeko.
Hurrengo Korrika Batzordeak, otsailaren 8an eta 10ean
Aurkezpenerako datak ez ezik, hurrengo Korrika Batzorderako egunak ere zehaztu dituzte dagoeneko. Otsaileko bigarren astean egingo dute bigarren saioa, bi herrietan. Astigarragan, hilaren 8an egingo dute, arratsaldeko 19:00etan, Kultur Etxe Zaharreko aretoan. Eta Hernanin, bi egun beranduago egingo dute, otsailaren 10ean, 19:00etan baita ere, AEKren lokalean. Horietan ere, herritarren parte hartzea eskatu dute, «Korrika iritsi bitartean, denon gustuko ekimen indartsu eta gogoangarriak aurrera eramateko».
Bestalde, jakinarazi dute dagoeneko salgai daudela Korrikako petoak, 5 euroan: Astigarragako Kultur Etxe Zaharrean, eta Hernaniko AEK euskaltegian.