Master Txapelketa jokatuko da Galarreta frontoian, datozen bost asteburuetan. Eta nobedadeetako bat izango da Aritz Zubiri goizuetarraren partehartzea, aurtengoan. Gaur bertan hasiko da txapelketa, eta aurreneko prebia jokatuko du Zubirik berak, Aritz Juanenearen kontra. Arratsaldeko 16:30etan hasiko da jaialdia Galarretan, eta hirugarren partidua izango da Zubirirena.
Gaur irabaziz gero, semifinaletara sailkatuko da goizuetarra, eta Endika Barrenetxea hernaniarraren kontra jokatuko luke, otsailaren 12an. Beste hiru erremontistak ere hartuko dute parte txapelketan. Imanol Ansa eta Ander Goikoetxea urnietarrek jokatuko dute beste prebia, datorren larunbatean, urtarrilaren 29an. Eta irabazleak, Javier Urriza izango du aurrez aurre, otsailaren 5ean. Otsailaren 19an jokatuko dute finala, bi semifinaletako irabazleek.