Aurrekoak bezala, ez da nolanahiko asteburua izango hau ere, Urumea bailarako pelotarientzat. Palaz zein eskuz, partidu garrantzitsuak jokatuko dituzte; horien artean, makina bat semifinal, eta baita final bat ere.
Euskal Herriko Kluben arteko Ligan jokatuko dute finala, palista hernaniarrek, nagusien mailan. Gasteizko Ogeta frontoian ariko dira Amaia Irazustabarrena eta Ariane Arrieta, gaur, Errekaleorren kontra. Arratsaldeko 15:30etan hasiko den jaialdian, seigarren partidua izango da beraien finala.
Bi hernaniarrak protagonista izango dira bihar ere, paleta larruzko Bizkaia Torneoan. Semifinalak jokatuko dituzte, Bilboko Bizkaia frontoian, eguerdiko 12:00etan hasita. Batean, Maider Huizi hernaniarra ariko da, Nagore Martinekin, Ariane Arrietaren eta Uxue Agirresaroberen kontra. Eta bestean, Amaia Irazustabarrenak jokatuko du, Leire Etxanizekin, Leire Galdosen eta Itsaso Erasunen kontra.
Gipuzkoako trinketeko semifinalak, eskuz
Eskuzko lehiari dagokionez, berriz, trinketean izango dituzte partidu garrantzitsuenak, Gipuzkoako Txapelketan. Gaur jokatuko diren bi semifinaletan ariko dira esku pelotari hernaniarrak, goizeko 10:30etan Iruran, kadete mailan. Aurrenekoan, Xuban Iturbek jokatuko du, Behar Zanako Arrutiren kontra; eta bigarrenean, Oier Azpeitia ariko da, Behar Zanako Otegiren kontra.
Bihar, trinketeko binakakoa hasiko dute bailarako hiru bikotek, nagusietan. Lehenengo mailan ariko dira John Linares eta Oier Gurutzealde astigartarrak, eta Ekaitz Cisneros eta Iñigo Labaka hernaniarrak; eta bigarren mailan, Ioritz Berasarte eta Egoitz Altuna hernaniarrak.