Txapelketa bikaina ezin hobeto borobildu zuen John Linares astigartarrak, larunbatean, trinketeko Gipuzkoakoan. Nagusien bigarren mailako finala zeukan Iruran, Iñaki Azkoitia azkoitiarraren kontra; eta nagusitasunez gailendu zen Linares (40-23).
Horrela, txapela jantzi bakarrik ez, igoera ere lortu du astigartarrak, eta lehenengo mailan ariko da datorren denboraldian, Gipuzkoako Txapelketan.
Txapelketa horretan bertan, emaitza onak lortu dituzte bi esku pelotari hernaniarrek ere: ligaxkako azkeneko partidua irabazi zuten Unax Manterola jubenilak eta Xuban Iturbe kadeteak, eta biak sailkatu dira finalerdietara. Aldiz, txapelketatik kanpo geratu da Markel Urdangarin kadetea, azkeneko partidua galduta. Eta partidu garrantzitsua galdu zuen Jon Jara jubenilak ere. Bere kasuan, finalera zuzenean sailkatzea zeukan jokoan, eta galdu zuenez, finalerdia jokatu beharko du. Datorren asteburuan izango dira finalerdietako partiduak. Semifinaletan ariko da Oier Azpeitia kadete hernaniarra ere, lehendik sailkatuta zegoena.
Euskal Herriko Kluben arteko Ligan, bestalde, porrota jaso zuten Xabier Apaolaza eta Mikel Lasa hernaniarrek, 22 urtez azpikoetan, Joko Alairen bikotearen kontra (13-22). Ondo eutsi zieten hasieran, baina maila haundiko bikotea da bizkaitarra, eta ihes egin zuten ondoren, garaipen erosoa lortzeko.
Eta Malerrekako Txapelketan ere, albiste txarrak hernaniarrentzat: Xuban Iturbek eta Oihan Legarretak 9-18 galdu zuten Lapkeko Izagirreren eta Calvoren kontra, eta txapelketatik kanpo geratu dira.
Gainerakoan, infantilek eta alebinek ez zituzten jokatu asteburuko partiduak, Gipuzkoako Txapelketetan, Eusko Jaurlaritzak hala aginduta. Erabakia «zentzugabea» izan zela adierazi dute CD Hernaniko esku pelota sailetik.
Zazpigarren garaipena Binakakoan, Iker Salaberriak
Maila profesionalari dagokionez, zazpigarren garaipena lortu zuen Iker Salaberria goizuetarrak, Promozioko Binakako Txapelketan. Erostarberekin batera, 22-11 nagusitu zen Zabalaren eta Etxebarriaren kontra, Zumaian. Bederatzi partidutik zazpi irabazita, bigarren postuan jarraitzen dute Salaberriak eta Erostarbek, Bakaikoaren eta Elizegiren atzetik (zortzi garaipen); eta zuloa haunditu dute, Zabalarekin eta Etxebarriarekin. Hirugarren ziren haiek, eta lau garaipenekin daude. Orain, Zubizarretak eta Eskirozek egin dute gora, hirugarren postura, bost garaipenekin. Jokatzeko bost partidu falta direnean, esku-eskura daukate finalerdietara sailkatzea, Salaberriak eta Erostarbek.