Igandean jokatu zuten, Bilboko Miribillan, Bizkaia Torneoko ligaxkaren azkeneko jardunaldia. Eta lidertza zeukaten jokoan bi hernaniarrek, elkarren kontra: Maider Huizik, Nagore Martinekin; eta Amaia Irazustabarrenak, Leire Etxanizekin. Huizi eta Martin nagusitu ziren, bi jokoetan (0-2), eta beraiek bukatu dute ligaxka lider.
Beste partiduan, berriz, porrota jaso zuen Ariane Arrieta hernaniarrak, Uxue Agirresaroberekin, Leire Galdosen eta Itsaso Erasunen kontra (2-0). Horrela, azkeneko postuan bukatu dute ligaxka, eta Huiziren eta Martinen kontra jokatu beharko dute semifinaletan. Irazustabarrenak eta Etxanizek, bere aldetik, Galdos eta Erasun izango dituzte aurrez aurre, final haundirako pasearen bila.
Euskal Herriko Ligan, bikain
Bestelako txapelketetan ere aritu dira bailarako palistak, asteburuan. Euskal Herriko Kluben arteko Ligan, esaterako, bikain aritu dira hernaniarrak. Jubeniletan, Hernaniko frontoian aritu ziren Enara Macicior eta Ane Kerejeta. Final laurdena erraz irabazi ondoren, Larraun B menderatu zuten semifinalean (15-9), baina finala galdu zuten Orozko Olgetanen kontra (11-15). Nagusietan, berriz, Etxarri Aranazen aritu ziren Amaia Irazustabarrena eta Ariane Arrieta, eta erraz nagusitu ziren, Auñamendi taldearen kontra (11-30).
Eta Udaberriko Txapelketan, elkarren kontra aritu ziren bailarako bi bikote Txomiñenen, nagusietan: Izaro Arraras eta Maialen Eldua astigartarrak, eta Ekine Balerdi eta Eider Otaegi hernaniarrak. Balerdi eta Otaegi nagusitu ziren (13-30).