Hitzordu garrantzitsua dauka gaur, Irurako Ametsa trinketean, John Linares astigartarrak: trinketeko Gipuzkoako Txapelketaren finala jokatuko du buruz buru, nagusien bigarren mailan, arratsaldeko 16:30etan hasita. Iñigo Azkoitia azkoitiarra izango du aurrez aurre.
Oso partidu lehiatua espero da, ligaxkako aurrekariak erakusten duenez. Orduan, multzo berean aritu ziren biak, eta azkoitiarra nagusitu zen, 40-39; baina astigartarrak bukatu zuen ligaxka aurreneko postuan.
Hernaniarrek ere zita garrantzitsuak dauzkate Irurako trinketean. Gaur, Markel Urdangarin kadeteak jokatuko du 11:30etan, eta irabaziz gero, finalerdietara sailkatuko da. Eta bihar, jubenilen txanda: Unax Manterolak Oier Alegria taldekidearen kontra jokatuko du, eta irabaziz gero finalerdietan izango da; eta Jon Jarak Lapkeko Ituarte izango du aurrean, eta irabazita, multzoko lider bukatuko du, eta finalera sailkatuko da.
Hernaniko frontoian, berriz, maila haundiko partidua izango da gaur, 18:00etan. Euskal Ligako 22 urtez azpikoena jokatuko dute Xabier Apaolazak eta Mikel Lasak, Zeanuriko Joko Alai klubaren kontra, oso maila oneko gazteak dauzkana.