Globo eta ponpa artean iritsi ziren Errege Magoak bailarara, Goizuetan barrena

Ilusioz eta pozez gainezka hartu zituzten Errege Magoak, goizuetarrek, asteazken arratsaldean. Argazkiak: Felix Loiarte

Goizuetan bakarrik egin zuten kale buelta asteazkenean, osasun egoeragatik; baina gau horretan, bailara osoko etxeetara egin zuten bisita, haur eta helduei opariak eramatera.

Osasun egoerak aldatu du Errege Magoen plana, aurten ere, data seinalatu hauetan. Eta segurtasunagatik, zenbait herritan ez dute kale bueltarik egin; Hernanin, esaterako, ez da kabalgatarik izan, joan den urtean bezala.

Goizuetan barrena iritsi ziren Errege Magoak Urumea bailarara, globo eta xaboi-burbuila artean; eta harrera beroa egin zieten herritarrek, bertan. Kalez kale ibili ziren, eta Xalto eskolako frontoian elkartu ziren gero gaztetxoekin zein helduekin, urte osoko kontuak eta bizipenak berritzeko, eta hasi berri den urtean ere txintxo portatu daitezen eskatzeko. Bertan banatu zituzten aurreneko opariak, bete-beteta ekarri zituzten zakuen karga arintzeko eta haurrak ilusioz betetzeko.

Eta gainerako opariak, gauean banatu zituzten, etxez etxe. Goizuetarrak agurtu ondoren, bailara osoko etxeetara egin zuten bisita Errege Magoek, denak lo zeudenean, gutun luzeetan eskatu zizkieten oparietako batzuk eramateko.

Lan gogorra izan zuten gau osoan, baina animoak eman zizkieten, esaterako, Hernaniko Musika Bandak eskaini zizkien doinuek. Kabalgatarik gabe ere, kalera atera ziren musikariak, Errege bezperaren arratsaldean, Erregeak datoz doinuaren airera herriko txokoak alaitzera, eta haien etorrera iragartzera.

Kronika egunero, euskaraz eta doan jasotzen segi ahal izateko, Kronikalari gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez Kronikalari!