Lau final zeuzkaten jokoan asteburuan, Urumea bailarako esku pelotariek; eta horietatik hiru irabazi dituzte. Hodei Expositok jantzi du txapel garrantzitsuena, Bankoa-DV Torneo entzutetsuko finala irabazita. CD Hernani taldeko astigartarra 21-22 nagusitu zen, Aimar Morgaetxebarria zornotzarrarekin batera, Muruaren eta Irazustabarrenaren kontra, Zarautzen.
Partidu gogorra jokatu zuten lauek: 619 pelotakada, eta ia ordu eta laurdeneko iraupena. Exposito eta Morgaetxeberria izan ziren nagusi peloteoan, bereziki 6-3ko markagailuari buelta eman eta 6-9 aurreratu ondoren; baina ez zuten lortu nahi bezalako tarterik egitea. Are gehiago, kontrarioek izan zuten partiduko alderik haundiena, 16-12 aurreratuta.
Berriro eman zioten buelta (16-17), eta erabat berdindu zen partidua. 20-21 aurretik zirela, bukatzeko aukera izan zuen astigartarrak, baina huts egin zuen txokoan, eta azkeneko tantoan jokatu zuten dena. Orduan, Murua izan zen gantxoarekin asmatu ez zuena, eta Expositok eta Morgaetxeberriak lortu zuten garaipena. 10 tanto eta 6 huts eginda bukatu zuen partidua, aurrelari astigartarrak.
Gipuzkoakoan, bi final irabazi eta bat galdu
Gipuzkoako Txapelketan jokatu zituzten beste hiru finalak, buruz buru. Infantilen bigarren mailan, txapela jantzi zuen Ekhi Oses hernaniarrak, Lapkeko Munduate bi jokotan menderatuta: 8-5 eta 8-1. Alebinetan, berriz, lehenengo mailako finala galdu zuen Imanol Ormazabalek, bi jokotan, Lapkeko Landaren kontra (3-8 eta 6-8).
Eta ekialdeko kontsolazio faseko finala irabazi zuen Aratz Labaka alebin hernaniarrak, Txulobiko Tejeriaren kontra, oso partidu estuan, hiru jokotan: 5-8 galdu, 8-7 irabazi, eta desenpatean 4-3 nagusitu.