Urtero bezalaxe, oso berezia izan da aurtengoan ere, abenduaren 24a. Urumea bailara osoko herritarrak kalera atera ziren Olentzero eta Mari Domingi agurtzera, eta momentu goxoak eta emozioz betetakoak bizi zituzten herritar guztiek.
Aski ezagunak dira Euskal Herri osoan bi pertsona horiek, eta, noski, gure bailaran ere ez zuten hutsik egin. Fin-fin antolatu ziren Aranora, Astigarragara, Ereñotzura, Goizuetara eta Hernanira garaiz iristeko, eta goizean zein arratsaldean, txoko guztietan egin zituzten geldialdiak. Bailarako umeen gutunak jaso, goxokiak banatu, Gabon kantak abestu eta irrifartsu agurtu zituzten haien etorrerara bertaratu ziren haur, gazte eta heldu guztiak.