Gaur bertan hasiko dute asteburuko partidu sorta, bailarako esku pelotariek; eta partidu garrantzitsuak jokatuko dituzte, gainera. Semifinaletara pasea daukate jokoan lau pelotarik, Gipuzkoako Txapelketan: Ekhi Oses, Manex Alberdi eta Oier Arsuaga hernaniarrek, eta Imanol Ormazabal astigartarrak.
Gaur daukate final laurdenetako partidua lauek, eta Hernanin ariko dira hiru. Alebinetan, elkarren kontra ariko dira Arsuaga eta Ormazabal, kiroldegiko frontoian, 19:50etan. Eta segidan, infantil mailakoa jokatuko du Osesek, Epleko pelotariaren kontra. Alberdik, berriz, Bergaran jokatuko du, 19:00etan.
Arsuagak, beste zita garrantzitsu bat dauka larunbat arratsaldean: Elizondoko Txapelketako final laurdena jokatuko du, Aratz Labakarekin batera.