Aurreko larunbatean egin zuen debuta Alain Agirre hernaniarrak, rallyetako kopiloto bezala; eta ezin hobeto hasi zuen bere ibilbidea: Garesko Rallysprinta irabazi zuen, Mattin Villares Urdazubiko pilotoarekin batera, Renault Clio Maxi kotxearekin.
Izatez, Jon Zozaia goizuetarra da Villaresen kopilotoa, baina Agirreri utzi zion eskuineko eserlekua, proba honetarako.
Zazpigarren edizioa zuen Garesko probak, eta Nafarroako Rally Txapelketarako puntuagarria zen. 15 kilometroko zirkuitua hiru aldiz osatu behar izan zuten partehartzaileek, eta hiru txandetan markatu zuten denbora onena Agirrek eta Villaresek. Buelta guztiak batuta, 23 minutu eta 32 segunduko denbora lortu zuten. 10 segunduren aldea izan zuten bigarren sailkatuekin, Aitor Aristregui eta Mikel Izcorekin; eta 31 segundukoa hirugarren izan zirenekin, Iñaki Zozaya eta Xabier Anduezarekin. Guztira, 38 kotxek hartu zuten parte Garesen.