Aurreko asteburuan atseden hartu ondoren, goi-mailako partidu batekin bueltatuko da Hernani lehiara, nesken Ohorezko Erregional Mailan: Eibar liderra hartuko dute berdeek Zubipen, bihar arratsaldeko 16:30etan.
Partidurik galdu gabe dago talde eibartarra, eta hori aldatzea dute helburu hernaniarrek, biharkoan: hiru puntuak eskuratu, eta lidertzara gerturatu nahi dute. Izan ere, lau puntura daude une honetan, sailkapeneko hirugarren postuan.
Osteguneko euriteak zalantzan jarri zituen, asteburuan Zubipen jokatzekoak ziren partiduak. Urak hartu zuen zelaia, eta txukuntzeko lanetan eman zuten atzoko eguna, taldeko arduradunek. Horrekin, lortu zuten asteburuko partiduak bere horretan mantendu ahal izatea, eta baita atzoko entrenamenduak ere, atzo eguerdian taldeak berak jakinarazi zuenez. Beraz, ezustekorik edo bestelako arazorik ez bada, jokatu egingo dira, Zubipen bertan, gaur eta bihar etxean aritzea dagokien talde berdeen partidu guztiak.
Mundarroko bi talde nagusiak, Zarkumendegin
Etxean jokatuko dute Mundarroko bi talde nagusiek ere, Erregional Preferenteetan. Neskek Intxaurdiren bisita jasoko dute Zarkumendegin, gaur eguerdiko 12:30etan. Orain arte, puntu bakarra lortu du talde donostiarrak, eta azkeneko postuan dago sailkapenean. Beraz, irabazteko moduko partidua izango dute astigartarrek, goiko postuetara gerturatzen jarraitzeko: bosgarren daude sailkapenean, baina oso gertu daukate bigarrena ere, hiru puntura.
Talde moreko mutilek, berriz, kontrario zuzen bat izango dute aurrez aurre: Usurbil hartuko dute Zarkumendegin, gaur arratsaldezko 15:30etan. 10 partidu jokatuta, puntu bakarreko aldea dago bi taldeen artean: 14 punturekin bosgarren dago Usurbil, eta 13 punturekin seigarren Mundarro.
Hernaniko mutilen taldea, Añorgan bihar arratsaldean
Asteburuan etxetik kanpo ariko dena, Hernaniko mutilen talde nagusia izango da. Añorgara joango da Ohorezko Erregional Mailako taldea, bihar, arratsaldeko 17:00etan Añorgaren kontra jokatzeko. Aurreko astean Ordiziarekin berdindu ondoren, puntuak hirunaka pilatzen hasi nahi dute berdeek berriro, sailkapenean beherago dagoen talde baten kontra.