Hiru partidu oso garrantzitsu jokatu dituzte bailarako palistek, Gipuzkoako Txapelketan, joan den asteburuan; eta ez dute nahi bezalako emaitzarik lortu, bakar batean ere.
Finala zeukaten Amaia Irazustabarrena eta Ariane Arrieta hernaniarrek, igandean Hernanin, neska nagusien lehenengo mailan. Eta 27-30 galdu zuten, Su Berriko Leire Galdosen eta Maider Mendizabalen kontra. Frontoian izugarrizko giroa zegoela, Su Berrikoen sendotasunari eutsi ezinik aritu ziren hernaniarrak, uneoro markagailuan atzetik. 26na berdintzea lortu zuten, baina gehiago izan ziren kontrarioak, azkeneko zatian. Mendizabal nagusi izan zen atzean, eta aukera gutxi izan zituzten hernaniarrek, tantoak bukatzeko. Edonola ere, tanto ikusgarriak lortu zituzten bi aurrelariek.
Hernanin bertan, baina larunbatean, semifinala zeukaten Ainhoa Urienek eta Ekhine Balerdik, nagusien bigarren mailan; eta 14-30 galdu zuten, Ataungo Amaia Lopezen eta Naiara Aldasororen kontra. Ataundik etorritako makina bat zaleren burrunbak urduri jarri zituen hernaniarrak: ez ziren fin aritu hasieran, eta akats asko egin zituzten. Horrela, alde haundia lortu zuten kontrarioek, eta ezin izan zioten buelta eman.
Eta semifinaletan aritu dira Ganix Urdangarin eta Beñat Zubiarrain astigartarrak ere, mutilen hirugarren mailan. Joanekoa Orion 25-21 galdu ondoren, bueltakoa jokatu zuten ostiralean, Txomiñenen: 25-24 irabazi zuten, Orioko Lizasoren eta Aldalurren kontra; baina tantoen kontaketak, oriotarrei eman die txartela, eta finaletik kanpo geratu dira astigartarrak. Edonola ere, bigarren mailara igoera ziurtatuta zeukaten aurretik.
