Egun seinalatua zen atzokoa, hildakoak gogoratzeko; eta makina bat herritar gerturatu ziren, Urumea bailarako hilerrietara, Santu Guztien Egunean. Ohi bezala, eguerdian bertaratu ziren herritar gehien, lore sorta ederrak eskuan hartuta. Hernaniko Plazan ere nabaritu zitekeen berezia zela eguna, goizean goizetik jarri baitzuten postua lore saltzaileek.
Elizkizunek ere ez zuten hutsik egin, atzokoan. Astigarragan, urtero bezala, hilerrian bertan egin zuten meza, hildakoen omenez. Eta Hernanin eta Ereñotzun, elizetan egin zituzten ospakizunak.
Azkeneko horietan, gaurko ere jarri dute hitzordua, Hildakoen Egunez. Ereñotzuko San Antonio elizan, goizeko 10:00etan egingo dute; eta goizetik eguerdira izango dira Hernaniko hiru elizetakoak: Agustinetan aurrena, 09:30etan; Floridako San Jose Langilean ondoren, 11:00etan; eta San Joan Bataiatzailea parrokian azkenik, eguerdiko 12:00etan.