Egun seinalatua da gaurkoa: Santu Guztien Eguna. Falta diren senitartekoak, lagunak, ezagunak... izango dituzte gogoan Urumea bailarako biztanleek. Lore eskaintza ohikoa izaten da gaurko egunez; hilerria kolorez janzten da herritarrek ematen dituzten lore sorta eta zentroekin. Egunean bertan egiten dute gehienek hilerrirako bidea; izaten da ordea, aurretik dena prest izatea gustatzen zaionik: panteoia edo nitxoa txukundu, lorez jantzi... Atzo mugimendua nabari zen herriko lora dendentan.
Santu Guztien Egunean ere mezak ez dira faltako. Jaiegunetako meza orduetan izango dira ospakizunak ondorengo eliza hauetan: 09:30etan, Agustinetakoan; 10:00etan, Ereñotzukoan; 11:00etan, Floridan; eta, 12:00etan, San Joan Bataiatzailearenekoan. Astigarragan ere meza izango da Santu Guztien egunean, hilerrian bertan, goizeko 11:00etan.
Bihar, hildako guztien egunean ere mezak
Bihar, azaroaren 2an hildako guztien izenean ospatuko dira goizeko 09:00etan Agustinetan; eta, 19:00etan, berriz, San Joan Bataiatzailea parrokian.
Ereñotzuko eta Floridako parrokietan Santu Guztien egunean izango dira gogoratuak (10:00etan eta 11:00etan, alegia).
Horrekin batera, Covid-19aren izurritea dela-eta, arropategiko zerbitzua bertan-behera geratu zen. Bada, bihar azaroaren 2an abian jarriko da berriro martxan: arropa-bilketa astearte goizean egingo da, 09:30etatik 12:00etara. Arropa-banaketerako hitzordua, etzi jarri dute: arratsaldeko 15:30etatik 17:30etara.