Partidu mordoa jokatuko dute bailarako pelotariek datozen egunetan. Gaur eta bihar izango dira norgehiagokak, eta Hernanin, Astigarragan, zein etxetik kanpo neurtuko dituzte indarrak.
Gaur, 18:30etatik aurrera, Xuban Iturbe eta Oier Azpeitia kadeteek Ilunpe klubaren aurka jokatuko dute, Azpeitian. Gainera, lidergoa mantentzeko, irabazi egin beharko du bikote hernaniarrak. Beraz, partidu interesgarria espero da, lehia bizikoa.
Horrez gain, beste hainbat partidu ere izango dira Hernanin, gaurkoan. Alebinek, infantilek zein kadeteek izango dituzte norgehiagokak. Lehenengoa Lier Zugastirena izango da, alebinetan, arratsaldeko 19:30etan hasita.
Partiduak Astigarragan, gaur
Hernaniarrek ez ezik, esku pelotari astigartarrek ere partidu gehienak gaur jokatuko dituzte. Zenbait alebinek eta infantilek gaur dute hitzordua, arratsaldeko 19:00etan hasita. Imanol Ormazabalek indarrak neurtuko ditu Ugaitz Barriola hernaniarraren aurka eta Isastik Hernaniko Oier Macicior izango du aurrez aurre. Ondoren, nagusien mailan, pala partidua izango da Txomiñenen: Mundarro-Urnieta.
Bihar, berriz, partidu bakarra izango dute Mundarrokoek, kadeteen mailan. Etxetik kanpo izango da, Izurunen kontra, Donostian. Ordua zehazteko dago oraindik.