Azpeitiko Txapelketaren finalean izango da Endika Barrenetxea hernaniarra, Julen Loitegi urnietarrarekin batera. Joan den larunbatean, 40-29 nagusitu ziren Urrutia II eta Larrañagaren kontra, eta horri esker, B multzoko lider bukatu dute.
Bukaeran alde erosoarekin nagusitu arren, kosta egin zitzaien, Barrenetxeari eta Loitegiri. Urrutia eta Larrañaga izan ziren aurretik, 25garren tantora arte, 4-5 tantoren aldearekin. Baina hortik aurrera, martxa bat gehiago sartu zuen hernaniarrak, eta partidua hautsi zuen, bereziki sakearekin min eginda. Gainera, eskuan pelotakada bat jaso zuen Urrutiak, eta nekea ere nabaritu zuten bukaeran.
Finalean, kontrario izango dituzte Ansa II eta Martirena. Larunbateko bigarren partidua irabazi zuten haiek, Urriza eta Labakaren kontra (35-40). Nahikoa zuten 32 tanto lortzea, baina maila ederrean aritu ziren Ansa eta Martirena. Sekulako konfiantzarekin aritu zen Martirena, eta Ansak Urrizari eutsi ez ezik, nagusitu ere egin zitzaion azkeneko tantoetan. 31-29 izan ziren aurretik Urriza eta Labaka, baina azkeneko tantoetan, pelota bizi mugitu eta zuloak aurkitu zituzten urdinek, partidua irabazi eta finalera sailkatzeko.
Datorren larunbatean jokatuko dute finala, eta hirugarren posturako lehia ere izango da egun berean. Finaletik kanpo geratu ondoren, horretan ariko da Aritz Zubiri goizuetarra, Goikoetxea Vrekin batera, Urrutia II eta Larrañagaren kontra.