Asteburu gogorra bailarako esku pelotarientzat, Gipuzkoakoan

Ez du asteburu onena izan, Urumea bailarako esku pelotak; eta jokatutako partiduetatik, gehienak galdu dituzte hernaniar eta astigartarrek. Eta are gogorragoa izan da jardunaldia, porrot horietako batzuek eragin dutelako hainbat bikote geratzea Gi­puzkoako Binakako Txapelketaren azken fasera sailkatzeko aukerarik ga­be.

Hori da, esaterako, Hodei Exposito astigartarraren eta Markel Lizeaga hernaniarraren kasua, nagusien ohorezko mailan. Pagazperen kontra 22-13 galduta, mailari eusteko lehian aritu beharko du CD Hernaniko bikoteak, Mundarrok bezalaxe. Egoera berean daude Iñigo Urkizu eta Iñigo Labaka hernaniarrak, nagusien lehenengo mailan; eta Xabier Salaberria eta Xabier Ortiz de Urbina herrikideak, nagusien bigarren mailan: Oiarperen eta Lapkeren kontra galdu zuten, hurrenez hurren; eta mailari eusteko lehian aritu beharko dute bi bikoteek, datozen asteotan.

Iturbe eta Legarreta kadete­ek, ordea, bosgarren garaipena lortu zuten, Ilunperi 22-3 irabazita; eta partidurik galdu gabe, bere multzoko lider daude.
Infantil eta alebinak, aldiz, buruz buru ari dira Gipuzkoako Txapelketan; eta beraien kasu­an, ez dira hain txarrak izan emaitzak. Izan ere, garaipenak lortu dituzte Manex Alberdi, Joseba Arretxe, Oinatz Gaskon eta Ekhi Oses hernaniarrek, infantiletan; eta Aratz Labaka eta Oier Arsuaga hernaniarrek, eta Jon Ramirez eta Imanol Ormazabal astigartarrek, alebinetan.

Bestalde, Aimar Olaizola goi­zuetarrak azkenekoz jokatu zuen Azpeitian eta Iruñeko Labriten, ostiralean eta larunbatean. Eta biak irabazi zituen, Jon Mariezkurrenarekin: 22-11 Peña II eta Albisuri; eta 22-14 Laso eta Arangureni.