Joan den asteko osteguna berezia izan zen Kronikako kideontzat zein Langile Ikastolako ikasleentzat. Izan ere, Kronikara bisita egin zuten bosgarren mailako ikasleek eta euskera irakasleek. Denera, 75 ikasle inguruk ezagutu zuten bulegoa, eta, horrekin batera, egunkariaren nondik norakoak azaldu genizkien.
Ikasgela bakoitza bi multzotan banatu eta sei txanda prestatu genituen. Horrela, pixkanaka sartu ziren erredakziora. Lehenik, azalpen txiki bat jaso zuten eta, ondoren, inprimaketa nola egiten dugun azaldu genien. Horrez gain, bitxikeriaren bat partekatzeko denbora ere izan genuen.
Esanak esan, pozgarria da guretzat bailarako ikasleak gurean izatea. Agian, etorkizuneko kazetariak, publizistak, administrariak, Doberako langileak edota Kronikalariak izango dira gazte hauek. Auskalo! Baina, behintzat, haiek gure berri izatea eta egunerokoan zer egiten dugun azaltzeak gogoz betetzen gaitu.
