Haurrak Ere Bai sareak ez dio justifikaziorik ikusten umeek aire zabalean maskarilla erabili behar izateari. Horregatik, horren aurka protesta egiteko, ikastetxeetako atarian eserialdiak egiteko deia luzatu zuten joan den astean. Horren barruan, atzo, Urumea bailarako Lehen Hezkuntzako zenbait zentrotako ikasleek zein etxekoek egoera salatu zuten.
Maskarilla aire librean, ez
Arratsaldeko 16:30etan, eskolatik ateratzean, zentroko atarian planto egin zioten maskarilla erabiltzeari. Mobilizazio horrekin, salatu zuten eskolatik kanpo maskarilla derrigorrez erabili behar ez badute, ez duela zentzurik ikastolan, aire librean, erabilera derrigorrezkoa izatea. «Azken hezkuntza protokoloaren ostean zur eta lur gaude, ez baitiogu 6-12 urte bitarteko haurrek aire zabalean maskarillarekin egon beharraren argudioari zentzurik aurkitzen. Haurrak herriko parkeetan eta plazetan maskarillarik gabe baitabiltza», argudiatu zuten Haurrak Ere Bai sareko kideek.