Primerako martxa hartu du Mundarrok, mutilen Gipuzkoako lehenengo mailan; eta hirugarren garaipena lortu zuen segidan, larunbat arratsaldean Añorgan: 49-54 nagusitu zitzaion Añorgari. Ez zioten nahi bezain ondo ekin partiduari, eta aurreneko laurdenean sei punturen aldea hartu zuten añorgatarrek, markagailuan (25-19). Baina hortik aurrera, partiduari buelta eman zioten. Defentsan lan haundia eginda, bi puntura murriztu zuten aldea atsedenaldira iritsi aurretik (31-29); eta aurrea hartu zuten markagailuan, hirugarren laurdenean (38-39). Azkeneko 10 minutuetan, ordea, kosta egin zitzaien, eta aurrea hartu zuen Añorgak, lau minuturen faltan (48-45). Baina 1-9ko partziala lortu zuten orduan, garaipena Astigarragara ekartzeko.
Hernaniri, ordea, kontrakoa gertatu zitzaion: azkeneko minutuetan egin zion ihes garaipenak, etxean, Donosti Dolphins taldearen kontra (53-60). Aurreneko laurden kaxkarraren ondoren (8-15), atzetik aurrera egin zuten hernaniarrek, eta 37-39 iritsi ziren azkeneko laurdenera. Eta lortu zuten markagailuan aurretik jartzea, zazpi minutu falta zirenean (46-44). Baina hortik aurrera, gehiago izan ziren donostiarrak, eta ezin izan zituzten gelditu.