Beste asteburu batez, mendi lasterketen lehiarekin jarraitu du Hodei Lujanbio goizuetarrak; eta beste behin aritu da onenekin. Oraingoan, gainera, zita bikoitza izan du Urdazubin, Kontrabandisten Lasterketan: aurrena, Gaueko Lanak izeneko lasterketa egin zuen, larunbat gauean, 9,5 kilometrokoa; eta ondoren, igande goizean, 21 kilometrokoa.
Bigarren izan zen Lujanbio, gaueko proban, 50:45 denborarekin. Jon Ridruejo izan zuen segundu batzuk aurretik (50:29). Eta maratoi erdian, laugarren sailkatu zen goizuetarra, 1:49:10 denborarekin. Aurretik izan zituen Ander Iñarra (1:43:22), Iñigo Macias (1:45:02) eta Damien San Martin (1:46:26). Hiru horiek, ordea, ez zuten parte hartu larunbat gaueko proban, eta beraz, sailkapen nagusian garaile izan zen Hodei Lujanbio, bi probetako denborak batuta.
Ibai Alba seigarren, Hiru Hondartzetako Krosean
Mendian ez ezik, errepidean ere aritu dira bailarako korrikalariak, asteburu honetan. Hiru Hondartzetako Kros ezagunean aritu dira, Donostian, 10 kilometroko ibilbidearekin. Eta asko izan dira, parte hartu duten hernaniar eta astigartarrak. Zehazki, 28 hernaniar eta 27 astigartar aritu ziren bertan.
Horien artean, Ibai Alba hernaniarrak lortu zuen denborarik onena (32:20), eta seigarren postuan bukatu zuen lasterketa. Oso aurrean ibili ziren Alexander Iturralde (24garren, 35:01), Ander Salaberria (75garren, 37:34), Julen Gaztañaga (95garren, 38:24) eta Jon Otxotorena (109garren, 38:49) herrikideak ere. Emakumezkoen artean, 29garren sailkatu zen Maider Martin (44:51).
Helmugan aurreneko astigartarra, berriz, Sergio Garzo izan zen, 77garren, 37:40 denborarekin; eta 125garren sailkatu zen Ander Rengel (39:14). Libe Lafuente izan zen aurreneko emakumezkoa, 71garren (48:52).