Partidu ugari izan dituzte asteburuan, bailarako pelotariek. Horietako batzuk, gainera, norgehiagoka bat baino gehiago jokatu dituzte bi egunetan. Ostiralean, Kepa Arroitajauregiren omenezko trinkete txapelketa izan zuten Amaia Irazustabarrenak eta Ariane Arrutik, Abadiñon. Topaketa gogorra izan zen, lehia bizikoa; azkenean, 30-28 galdu zuten hernaniarrek, Sobrinoren eta Saezen aurka.
Larunbat goizean, Gipuzkoako lehenengo mailan, Maider Huitzik eta Amaia Irazustabarrenak Su Berriren kontra neurtu zituzten indarrak, eta 30-25 galdu zuten. Arratsaldean, berriz, EH Elite mailan, Irazustabarrenak eta Arrietak beste partidu bat jokatu zuten Mallabian. Emakumezkoen gomazko paletako txapelketa izan zen, eta Martin eta Saez izan zituzten aurkari. Maila bikaina erakutsi eta 30-28 irabazi zuten Hernanikoek.
Gipuzkoako 2. mailan, derbia izan zuten Hernanik eta Mundarrok. Marina del Rio eta Izaro Arraras astigartarrek 5-30 galdu zuten Ekhine Balerdi eta Ainhoa Urien hernaniarren aurka.